Oktyabrın 9-dan etibarən Sea Breeze ərazisində 7–14 yaşlı uşaqlar üçün EcoBox interaktiv ekokvesti başlayır. Layihə təbiətin araşdırılmasını, oyun tapşırıqlarını və ətraf mühitlə praktiki tanışlığı bir araya gətirir.

EcoBox ekoloji düşüncənin və sahibkarlıq bacarıqlarının inkişafına yönəlmiş uşaq təhsil proqramı olan Spring Lab-ın qalib layihələrindən biridir. Layihənin ideyası Spring Lab-ın gənc iştirakçılarından ibarət komanda tərəfindən irəli sürülüb. İndi isə bu ideya «Ekosfera» sosial-ekoloji mərkəzi ilə əməkdaşlıq çərçivəsində Sea Breeze ərazisində həyata keçiriləcək.

Hər bir iştirakçı xüsusi tədqiqatçı bel çantası və fərdi marşrut əldə edəcək. Marşrut üzrə hərəkət edən, təbiətin müxtəlif elementlərini araşdıran və tapşırıqları yerinə yetirən uşaqlar adətən diqqətdən kənarda qalan detalları fərq etməyi öyrənəcəklər: canlı orqanizmlərin izlərini, bitkilərin xüsusiyyətlərini, küləyin istiqamətini, təbii səthlərin teksturasını və ətraf mühitdə baş verən dəyişiklikləri. Ekokvesti uğurla tamamlayan gənc tədqiqatçıları hədiyyələr və bonuslar gözləyir.

Layihə Sea Breeze-in ekoloji və maarifləndirici təşəbbüslər silsiləsini davam etdirir. Bu təşəbbüslər cəmiyyətin ekoloji fəaliyyətlərə cəlb olunmasına və uşaqlarda erkən yaşlardan ətraf mühitə qarşı məsuliyyətli münasibətin formalaşmasına kömək edir.

EcoBox layihəsinin başlanğıcı həmçinin UN-Habitat-ın beynəlxalq təşəbbüsü olan Urban October dövrünə təsadüf edir. Oktyabr ayı ərzində dünyanın müxtəlif yerlərində şəhərlərin və icmaların dayanıqlı inkişafına həsr olunmuş tədbirlər və müzakirələr keçirilir.

EcoBox oktyabrın 9-dan 31-dək hər həftənin cümə, şənbə və bazar günləri saat 11:00-dan 17:00-dək, hər saat təşkil olunacaq.

Başlanğıc nöqtəsi: The Grand

İştirak ödənişsizdir. Əvvəlcədən qeydiyyatdan keçmək tələb olunur.

Qeydiyyat linki: Link