2013-cü ilin aprel ayında Bakının mərkəzində postsovet məkanında analoqu olmayan bir hadisə baş verdi: Hacınskilər qardaşlarına məxsus tarixi bina 10,5-10,6 metr məsafəyə bütövlükdə köçürüldü, memarlıq üslubu və tarixi dəyəri tam şəkildə qorunaraq saxlanıldı.
Füzuli küçəsində (keçmiş Basina) yerləşən bina 1908-ci ildə inşa olunmuş və XX əsrin əvvəllərində Bakı neft burjuaziyasının nümayəndələri olan Hacınskilər qardaşlarına məxsus olmuşdur. Bu, Bakının sürətlə inkişaf edərək regionun əsas iqtisadi mərkəzlərindən birinə çevrildiyi dövr idi. Uzunluğu 52 metr, eni 35 metr, hündürlüyü 20 metr olan üçmərtəbəli bina öz miqyası və statusu ilə seçilirdi; müxtəlif illərdə burada yaşayış və ictimai təyinatlı müəssisələr fəaliyyət göstərmişdir.
Şəhərdə aparılan genişmiqyaslı yenidənqurma işləri zamanı binanın sökülməməsi, əksinə qorunaraq yerinin dəyişdirilməsi barədə prinsipial qərar qəbul edildi. Layihənin icrası tarixi binaların köçürülməsi üzrə 30 ildən artıq təcrübəyə malik olan Niderlandın Bresser Eurasia şirkətinə həvalə olundu.
.jpeg)
Hazırlıq işləri təxminən beş ay davam etdi və binanın fundamenti tamamilə yeniləndi. Köçürülmə prosesi isə 2013-cü il 23–27 aprel tarixlərində cəmi beş gün ərzində həyata keçirildi: çəkisi təxminən 18 min ton olan bina bir neçə millimetr qaldırılaraq 210 hidravlik qurğunun köməyi ilə yeni yerinə köçürüldü.
.jpeg)
Bu layihə şirkətin praktikasında ən iri miqyaslı əməliyyat olmaqla yanaşı, bu məsafəyə köçürülmüş dünyanın ən ağır binası kimi tarixə düşdü və Bakıya Ginnesin Rekordlar Kitabına düşmək imkanı yaratdı.
