İçərişəhərin dar küçələri ilə gəzərkən şəhərin ən atmosferli art layihələrindən biri - “Sevgi ölkəsi” muralı ilə qarşılaşmaq mümkündür. O, Köhnə şəhərin dərinliyində, İllüziyalar Muzeyinin arxasında bir neçə binanın divarlarında yerləşir və artıq illərdir ki, foto çəkdirmək və sakit gəzişmək üçün sevilən məkanlardan biridir.
Mural sadəcə divar rəsmi deyil, birbaşa memarlıq səthində yaradılan monumental sənət əsəridir. Qrafitidən fərqli olaraq, bu cür işlər detallı şəkildə düşünülür və şəhər mühitinin ayrılmaz hissəsinə çevrilir.
Layihənin müəllifi azərbaycanlı rəssam Vüsalə Ağarazıyeva, həmçinin Daşqın Bayramov və Ağayar Bayrışovdur. Məhz bu komanda Bakıda ilk rəsmi mural layihələrinin əsasını qoyaraq küçə sənətinin geniş tanınmasına töhfə verib.
Bu gün onların işlərinə şəhərin digər ərazilərində də rast gəlmək olar. Lakin məhz İçərişəhərdə bu mural xüsusi hiss olunur - burada müasir sənət qədim divarlarla ahəngdar şəkildə birləşərək məkana yeni məna və hisslər qatır.
M. Qurtovenko
